Act 14 | MHL | STEP | Aria wiam erup ikiwemi Aikoniam owowa-pa fuunemik. Nan ikok sira naapiw wi Yuuda lotu koora wiar ikiwemik. Ikiwep Yeesus opora baliwep wia ookomiwkin wi Yuuda unowa ne owow oko teeria unowa opora wiar miimap kema kirep Yeesus opora wiar opamik.

Acts 14

Pol Banabas ikos Aikoniam owowa-pa uuwamik

1 Aria wiam erup ikiwemi Aikoniam owowa-pa fuunemik. Nan ikok sira naapiw wi Yuuda lotu koora wiar ikiwemik. Ikiwep Yeesus opora baliwep wia ookomiwkin wi Yuuda unowa ne owow oko teeria unowa opora wiar miimap kema kirep Yeesus opora wiar opamik. 2 Ne wi Yuuda papako opora me wiar opamik nain-ke wi mua papako kema wia mikiwkin kema bagiwirap wi opora opamik teeria nain me wia kookalemik. 3 Naeya wi wiam erup nain Aikoniam owowa-pa nan epa maala ikemik, wi keker opowa marew Yeesus opor eliwa nain wia maakem-ikemik. Ne opora wia maakemik nain Mua Maneka-ke kekanowa wieya maa miililina onomakemi opora makena arowamik. 4 Naap oniwkin wi owow emeria mua wiam fookap papako wiena Yuuda teeria wiokamik ne papako wiam erup nain wiokamik. 5 Wi owow mua ne wi Yuuda mua wi woos mua onaiya Pol Banabas ikos wia samorami nomon ika wiaru naep maemik. 6 Ne wiam erup opora naap miimap baurarep Likonia kame wiar kereremik. Kererep Listra, Debe ne owow unowa nain ikiwep Yeesus Krais opor eliwa wia maakem-miemik.

Wiam erup Likonia-pa uuwamik

8 Aria Listra owowa-pa nan, mua oko ona onak uroma-pa meren samora naap imenarek. Ne me soomarem-ikua. 9 O nan pokap ikok Pol opora wiar miimam-ikua. Ne Pol mokoka toonep urufap kema-pa maek, “Mua faa, Mua Maneka opora wiar miimap opor makena-ke naek. Naapeya merena wiar sariarinok,” kema-pa naap maek. 10 Naap maep kerewa maakek, “No iimare.” Naap maakeya mua nain patak naep iikirami wueliwa soomarek. 11 Ne aria wi emeria mua naap urufap Likonia oporiw kiriremi maemik, “Wi inasina-ke mua puukap i yiar oromik ee.” 12 Naap maemi wiena inasina oko unuma Sus naimik nain Banabas iwemik. Ne Pol o aakunow muaiya inasina oko unuma Eemes naimik nain iwemik.

13 Wiena inasina Sus inasin koora owow erepura-pa ikua, ne o koora-pa wiar uuwimik mua nain-ke bulmakau aawep, kakala tewerimep-puamik nain pekami pika maneka omopora-pa nan unow onaiya wiam erup wia patiru naep onamik. 14 Ne Pol Banabas naap wia miimap lawiliw akena Mua Maneka firekiyen naemik. Neemi wiena mia suuwowa pere-perekami karuwiw ikiwep wi yakeyak maneka gone wiar orop kerewa faremik, 15 “Ni moram sira naap yia onu naep oniman ya? I mua-ke, ni saarik. I Yeesus Krais opor eliwa nia maakowa ekapemik. Ni maa maken marewa nain piipuap Mua Maneka anane ikaiya nain ookeka naep nia maakowa ekapemik. Ona waisow aapereka, miiwa, ifera ne maa muutitik unowa nain onomakek. 16 Iiriw i emina kekanep sira yiena kookalowa-pa ikemik nain yia samorowa nain me yia samoram-ikua. 17 Ne yo efa amisareka naep anane ipia yia sesekam-ikomiya, ne maa unowa ona saana-pa imenarem-ikua. Ne kema eliwiw ikauk naep maa enowa unowa yia wuam-ikomiya.” 18 Naap wia maakemik-na weetak. Wis-keriw kekanep maa enekiw wia patiru naep akena oniyen naemik. Ne aria wi iiwawun kekan-afuriwkin patirowa piipuamik.

Pol nomon ika waremik

19 Ne aria wi Yuuda mua papako Antiok ne Aikoniam owowa-pa ekapemi wi owow mua kema wia mikiwkin iikirami Pol nomon ika waremi ifakimiwkin puok. Ne umok naep mufep pikiwep owow erepura-pa wafurap-puap ikiwemik. 20 Ne wia, wi Kristen teeria ekapep imararep ikaiwkin iikirak. Iikirap wiokap kiiriw owowa nain urupemik. Naap ikok uurik ona Banabas ikos Debe owowa ikiwemik.

Wiam erup wi Kristen teeria wia kekanowamik

21 Wiam erup Debe owowa-pa Yeesus opor eliwa wia maakiwkin emeria mua unowa opora opamik. Ne wi kiiriw kirep Listra, Aikoniam ne Antiok ekapemik. 22 Nan wi Kristen teeria papako kema wia kekanowami kema wia iikirowamik, wi kekanep Mua Maneka sira-pa wiar ikauk naep. Ne wia maakemik, “I Mua Maneka teeria-pa wiar ikowa nain sirirowa yiem-ikaikuan,” naap wia maakemik. 23 Ne aria wiam erup nain-ke owowa kui-kuisow wi Kristen teeria woos mua wia pepekimemik. Wia pepekimep unow onaiya maa enowa emi wuap ikok Mua Maneka nokaremi wapena ikiwosa-pa wiar wuami wia maakemik, “Ni Mua Maneka kekanowa-pa uuweka.”

Wiam erup Antiok kirep wiar ikiwemik

24 Aria wi Pisidia miiwa-pa naap wiar puukap oromi Pamfilia miiwa fuunemik. 25 Fuunep Pega owowa wiar ikiwep Yeesus opor eliwa wia maakemik. Nan ikok Atalia owowa wiar oromik. 26 Ne nan aasa aawep ikiwemi Antiok owowa-pa urupemik. Wi iiriw owowa nan ikaiwkin Mua Maneka-ke uuwowa wueya kema eliwiw wia sesekamik. Ne uuwowa wia sesekamik nain weeser-wuap kiiriw kirep ekapemik. 27 Ekapep wi Kristen teeria wia fiirimep wia maakemik, “Mua Maneka-ke yia kekanoweya i uuwamik, ne owow papako teeria Mua Maneka-ke era wia paaskomeya o teeria wiar ekamik.” 28 Opora naap wia maakep weesereya epa maala nan wiamiya ikemik.